លោក Robert Downey Jr. កំពុងកាន់ទូរសព្ទឆ្លាតមួយនៅក្នុងដៃ សង្ស័យថាជា OnePlus 8 Pro

 

កាលពីសប្តាហ៍មុននេះ យើងទទួលបានដំណឹងមួយ រាយការណ៍មកថា ក្រុមហ៊ុន OnePlus នឹងធ្វើការប្រកាសចេញជាផ្លូវការ នូវទូរសព្ទឆ្លាតជំនាន់ថ្មី ស្ថិតនៅក្នុងត្រកូល OnePlus 8 របស់ខ្លួន នៅក្នុងអំឡុងសប្តាហ៍ទី 2 នៃខែមេសា ឆ្នាំ 2020 ខាងមុខនេះ។ ជាងនេះទៅទៀត កាលពីម្សិលមិញនេះ យើងក៏ប្រទះឃើញ ទូរសព្ទឆ្លាតលំដាប់កំពូល OnePlus 8 និង OnePlus 8 Pro បានធ្វើការចុះឈ្មោះទៅក្នុងបញ្ជី TENAA របស់ចិន ដែលជាសញ្ញាបង្ហាញឲ្យយើងដឹងថា ពួកវាអាចនឹងបង្ហាញខ្លួនក្នុងពេលឆាប់ៗខាងមុខនេះ។

ដោយឡែកនៅក្នុងថ្ងៃនេះ តាមរយៈគេហទំព័រដ៏ល្បីឈ្មោះ Pricebaba យើងក៏ប្រទះឃើញរូបភាពមួយសន្លឹក ដ៏គួរឲ្យចាប់អារម្មណ៍។ តាមរយៈរូបភាពនេះ បានបង្ហាញថា លោក Robert Downey Jr. ដែលមនុស្សភាគច្រើនស្គាល់ថាជា Iron Man នោះ កំពុងចាប់កាន់ទូរសព្ទឆ្លាតមួយគ្រឿងនៅក្នុងដៃ ហើយបើយើងធ្វើការប្រៀបធៀបរចនារូបរាងរបស់ទូរសព្ទឆ្លាតមួយនេះ ទៅនឹងរូបភាពគម្រូ ក៏ដូចជារូបភាពបែកធ្លាយ ដែលយើងទទួលបានកាលពីពេលកន្លងនោះ បានបង្ហាញឲ្យយើងដឹងថា ទូរសព្ទឆ្លាតដែលលោក Robert Downey Jr. កំពុងចាប់កាន់ នៅក្នុងដៃនោះ គឺជាទូរសព្ទឆ្លាតលំដាប់កំពូល OnePlus 8 Pro ដែលត្រៀមបង្ហាញខ្លួនក្នុងពេលឆាប់ៗខាងមុខនេះ។ តាមរយៈរូបភាពដដែលនេះ ក៏បានធ្វើឲ្យយើងដឹងថា OnePlus 8 Pro បំពាក់មកជាមួយកាមេរ៉ាក្រោយសរុបចំនួន 4 គ្រាប់ ដោយ 3 គ្រាប់ ស្ថិតនៅចំកណ្តាល ក្នុងលក្ខណៈបញ្ឈរ និងមួយគ្រាប់ទៀត ស្ថិតនៅផ្នែកខាងឆ្វេងនៃកាមេរ៉ាទាំង 3 គ្រាប់នោះ ក៏ដូចជាអមជាមួយភ្លើង LED Flash ផងដែរ។

ខណៈពេលដែល ការបង្ហាញខ្លួនរបស់ទូរសព្ទឆ្លាតមួយនេះ កាន់តែខិតជិតមកដល់ហើយនោះ រូបភាពបែកធ្លាយមួយនេះ ត្រូវបានគេជឿថា គឺជាសកម្មភាពមួយក្នុងពេលដែល លោក Robert Downey Jr. កំពុងថតវីដេអូផ្សព្វផ្សាយពាណិជ្ជកម្មឲ្យក្រុមហ៊ុន OnePlus ដើម្បីទុកប្រើសម្រាប់បង្ហាញអំពីលក្ខណៈសម្បត្តិពិសេសរបស់ OnePlus 8 Pro។ អញ្ចឹងសរុបមកវិញ បើរូបភាពបែកធ្លាយមួយនេះ គឺជារូបភាពពិតមែននោះ គ្មានអ្វីចម្លែកនោះទេ ដែលលោក Robert Downey Jr. បានកាន់ប្រើ OnePlus 8 Pro មុនពេលប្រកាសចេញជាផ្លូវការ ព្រោះថាក្នុងពេលបច្ចុប្បន្ននេះ លោក Robert Downy Jr. គឺជាឯកអគ្គរដ្ឋទូតតំណាងឲ្យក្រុមហ៊ុន OnePlus។