ក្រុមហ៊ុន Xiaomi ទើបតែបញ្ចេញ Power Bank Wireless ថ្មីដែលមានថាមពលថ្ម ១០,០០០mAh និងមានតម្លៃ ១៣០,០០០ រៀល (៣៣ ដុល្លារ) ។

ប្រិយមិត្តជាច្រើន ប្រហែលជាធ្លាប់បានប្រើប្រាស់ ផលិតផលរបស់ Xiaomi ហើយ ដែលយើងឃើញថា វាមានច្រើនមែនទែន មិនថាជាឧបករណ៌សម្រាប់យកតាមខ្លួន ឬក៏ជាឧបករណ៌សម្រាប់ប្រើប្រាស់ នៅក្នុងផ្ទះនោះទេ។ ដោយឡែក ក្នុងពេលថ្មីៗនេះ Xiaomi បានធ្វើការប្រកាសចេញ Power Bank ជំនាន់ថ្មីមួយ ដែលមានរចនាបថរូបរាងស្អាតបែបទាន់សម័យ ហើយវាថែមទាំងអាចសាកបញ្ចូលថាមពលថ្មទៅកាន់ស្មាតហ្វូន ឬ ឧបករណ៍ដទៃដោយឥតប្រើខ្សែ ទៀតផង។

ពិតប្រាកដណាស់ Power Bank ខាងលើនេះ ត្រូវបានភ្ជាប់មកជាមួយថាមពលទំហំ 10,000mAh ជាមួយទំហំតូចល្មម ងាយស្រួលយកតាមខ្លួន ហើយកាន់តែពិសេសជាងនេះទៅទៀតនោះ វាអាចគាំទ្រការសាកបញ្ចូលថ្មទៅកាន់ស្មាតហ្វូន ដោយឥតប្រើខ្សែបានទំហំ 10W ថែមទៀតផង។ មិនតែប៉ុណ្ណោះ វាមានវិមាត្រ 14.79 x 7.06 x 1.66cm ជាមួយទម្ងន់ 230 ក្រាម ដែលស្រោបដោយ ផ្លាស្ទិករឹងមាំ ហើយវាក៏គាំទ្រសម្រាប់ការផ្ទេរថាមពលក្នុងកម្រិត 5V/2.4A, 9V/2A, 12V/1.5 តាមរយៈការសាកថ្មតាមខ្សែផងដែរ។ លើសពីនេះទៅទៀត Mi Wireless Power Bank នេះ អាច Support បច្ចេកវិទ្យាបញ្ជូនថាមពលថ្មល្បឿនលឿនទំហំ 18W ទាំងតាមរយៈការប្រើប្រាស់ USB-A និងរន្ធ USB-C ទៀតផង។ ក្រៅពីនេះ ថាមពលថ្មរបស់វា ត្រូវបានគេបញ្ជាក់ថា អាចសាកបញ្ចូលទៅអោយ iPhone X បាន 3 ទៅ 4 ដងផងដែរ។
មួយវិញទៀត Power Bank Wireless នេះ ត្រូវបានបង្កើតឡើងជាមួយជម្រើសពណ៌ខ្មៅ រីឯតម្លៃរបស់វាវិញ គឺត្រូវបាន Xiaomi ដាក់លក់ត្រឹមតែខ្ទង់ ១៣ ម៉ឺនរៀល (33 ដុល្លារ) តែប៉ុណ្ណោះ។ អញ្ចឹងហើយ បើតាមការរៀបរាប់ខាងលើនេះ អាចនិយាយបានថា Power Bank ខាងលើនេះ មានតួនាទីពីរដូចជា សម្រាប់ផ្គត់ផ្គង់ថាមពលអោយទៅឧបករណ៍ផ្សេងៗរួមមានស្មាតហ្វូនជាដើម និងមួយទៀត វាអាចប្រើដោយឥតតខ្សែមិនរញ៉េរញ៉ៃ ដែលជួយផ្ដល់ភាពងារស្រួលដល់អ្នកប្រើប្រាស់ ទៀតផង។

ប្រភព ៖ Beebom