ទូរស័ព្ទ Legion ទំនងជាភ្ជាប់មកជាមួយកាមេរ៉ាដែលបង្ហាញចេញពីចំហៀងនៃរាងកាយ
ផ្អែកទៅតាមដំណឹង ដែលទទួលបានកន្លងមក បានបង្ហាញឲ្យយើងដឹងថា ក្រុមហ៊ុន Lenovo បានត្រៀមខ្លួនរួចជាស្រេច ក្នុងការប្រកាសចេញជាផ្លូវការ នូវទូរសព្ទឆ្លាតប្រភេទហ្គេម ស្ថិតនៅក្រោមស្លាកសញ្ញា Legion របស់ខ្លួន ក្នុងពេលឆាប់ៗខាងមុខនេះ។ ទូរសព្ទហ្គេម Legion ត្រូវបានគេរំពឹងថា នឹងត្រូវបែងចែកចេញជា 2 ម៉ូឌែល ហើយពួកវានឹងបង្ហាញខ្លួនមកជាមួយកម្លាំងម៉ាស៊ីនលំដាប់កំពូល ថែមទៀតផង។ ដោយឡែកនៅក្នុងថ្ងៃនេះ តាមរយៈគេហទំព័រ Xda Developer យើងបានប្រទះឃើញរូបភាពជាច្រើនសន្លឹក ក៏ដូចជាលក្ខៈសម្បត្តិមួយចំនួនរបស់ទូរសព្ទហ្គេម Legion ផងដែរ។
តាមរយៈរូបភាពទាំងនេះ បានបង្ហាញឲ្យយើងដឹងថា ទូរសព្ទហ្គេម Legion នឹងបំពាក់មកជាមួយអេក្រង់លាតពេញ អមមកជាមួយ Speaker ចំនួន 2 ជាប្រភេទ Stereo ស្ថិតនៅចំពីមុខតែម្តង ដោយមួយស្ថិតនៅផ្នែកខាងលើនៃគែមអេក្រង់ និងមួយទៀតស្ថិតនៅផ្នែកខាងក្រោមនៃគែមអេក្រង់។ ជាងនេះទៅទៀត វាក៏បានបញ្ជាក់ឲ្យយើងដឹងថា ទូរសព្ទហ្គេម Legion នឹងភ្ជាប់មកជាមួយកាមេរ៉ាមុខ 1 គ្រាប់ ជាប្រភេទហូតចុះឡើង ទំហំ 20MP។ អ្វីដែលគួរឲ្យចាប់អារម្មណ៍នោះ គឺថាកាមេរ៉ាមុខរបស់វា មិនមែនផុសចេញពីផ្នែកខាងលើនៃតួខ្លួននោះទេ ប៉ុន្តែវាបែរជាផុសចេញពីផ្នែកចំហៀងនៃតួខ្លួនទៅវិញ។ ងាកទៅមើលផ្នែកខាងក្រោយវិញ នៅពេលដែលទូរសព្ទហ្គេម Legion ស្ថិតនៅក្នុងលក្ខណៈផ្តេក យើងឃើញថា វាត្រូវបានរំលេចឡើងដោយសញ្ញាព្រួញទាំងសងខាង គួបផ្សំជាមួយឆ្នូតអូសកាត់ រត់សំដៅទៅរករូបតំណាង Legion ស្ថិតនៅចំកណ្តាល ក៏ដូចជាអមមកជាមួយពាក្យថា Legion ស្ថិតនៅផ្នែកខាងលើ ផងដែរ។
